Home
દેશ-વિદેશ
જાણો વરસાદને લઈને આગાહી : રાત્રે ગરમ પવન ફૂંકાશે, મોટાભાગના શહેરમાં આટલા ડિગ્રીને પારો જશે!

જાણો વરસાદને લઈને આગાહી : રાત્રે ગરમ પવન ફૂંકાશે, મોટાભાગના શહેરમાં આટલા ડિગ્રીને પારો જશે!

09:04 PM May 24, 2026 Gujju News Channel

રાજ્યમાં કાળઝાળ ગરમીથી લોકો ત્રાહિમામ પોકારી ઉઠ્યા છે. હવામાન વિભાગે રાજ્યના અનેક જિલ્લાઓમાં કમોસમી વરસાદની આગાહી કરવામાં આવી છે.

Gujarat Weather Forcast : એક તરફ કાળઝાળ ગરમી અને ઉકળાટથી લોકો પરેશાન છે, તો બીજી તરફ હવામાન વિભાગે રાજ્યના અનેક વિસ્તારોમાં કમોસમી વરસાદની આગાહી વ્યક્ત કરી છે. શુક્રવારે સુરેન્દ્રનગરમાં તાપમાન 43.8 ડિગ્રી સુધી પહોંચ્યું હતું, જ્યારે અમદાવાદ 43.3 ડિગ્રી સાથે ગરમીથી ધગધગી ઉઠ્યું હતું. દરિયાકાંઠાથી આવતા ભેજવાળા પવનોને કારણે દિવસ દરમિયાન ગરમી અને રાત્રે બફારાનો ડબલ માર લોકોને સહન કરવો પડી રહ્યો છે. આ દરમિયાન હવામાન વિભાગે આજે રાજકોટ સહિત રાજ્યના 9 જિલ્લાઓમાં ગાજવીજ સાથે કમોસમી વરસાદની શક્યતા વ્યક્ત કરી છે. આગામી 7 દિવસ દરમિયાન ગરમી સાથે છૂટાછવાયા વરસાદી માહોલ યથાવત રહેવાની સંભાવના હોવાથી લોકો માટે હવામાનથી રાહત મળવાની આશા ઓછી દેખાઈ રહી છે.

► ક્યાં સૌથી વધુ તાપમાન નોંધાયું

રાજ્યમાં ગરમીનો કહેર દિવસેને દિવસે વધતો જઈ રહ્યો છે. ગઈકાલે શુક્રવારે ગુજરાતના અનેક શહેરોમાં તાપમાન 43 ડિગ્રીને પાર પહોંચતાં લોકો અકળાઈ ઉઠ્યા હતા. સુરેન્દ્રનગર 43.8°C સાથે રાજ્યનું સૌથી ગરમ શહેર બન્યું, જ્યારે અમદાવાદમાં પણ 43.3°C તાપમાન નોંધાતા લોકો ભારે ઉકળાટનો સામનો કરી રહ્યા છે. ગાંધીનગરમાં 43°C, રાજકોટમાં 42.9°C અને અમરેલીમાં 42.3°C તાપમાન નોંધાયું છે. ખાસ કરીને અમદાવાદ અને સુરેન્દ્રનગરમાં અચાનક દોઢથી બે ડિગ્રી જેટલો તાપમાનનો ઉછાળો આવતાં બપોરના સમયે રસ્તાઓ સુમસામ જોવા મળ્યા હતા. ગરમીના વધતા પ્રકોપને કારણે લોકોમાં ત્રાહિમામની સ્થિતિ સર્જાઈ છે.

► જાણો ક્યાં પડશે વરસાદ?

હવામાનમાં અચાનક આવેલા પલટાને કારણે ગઈકાલે જામનગર સહિત સૌરાષ્ટ્રના કેટલાક વિસ્તારોમાં કમોસમી વરસાદ નોંધાયો હતો. હવામાન વિભાગે આજે પણ રાજ્યના અનેક ભાગોમાં વાતાવરણ અસ્થિર રહેવાની આગાહી વ્યક્ત કરી છે. વિભાગના જણાવ્યા અનુસાર, પંજાબથી રાજસ્થાન સુધી સર્જાયેલી ટ્રફ લાઇનની અસરને પગલે સૌરાષ્ટ્રના રાજકોટ, અમરેલી, ભાવનગર, ગીર-સોમનાથ અને દીવ જિલ્લામાં ગાજવીજ સાથે હળવા વરસાદી છાંટા પડી શકે છે. સાથે જ દક્ષિણ ગુજરાતના નવસારી, વલસાડ, દમણ, દાદરા નગર હવેલી, ડાંગ, તાપી અને નર્મદા જિલ્લામાં પણ છૂટોછવાયો વરસાદ થવાની સંભાવના વ્યક્ત કરવામાં આવી છે. હવામાન વિભાગે ખેડૂતો અને નાગરિકોને સાવચેત રહેવાની સલાહ આપી છે.

► આગામી 7 દિવસની આગાહી

હવામાન વિભાગે સ્પષ્ટ કર્યું છે કે આવતીકાલથી આખા ગુજરાતમાં વાતાવરણ એકદમ સૂકું થઈ જશે. મહત્તમ તાપમાનમાં પણ કોઈ મોટો ઘટાડો થવાની આશા નથી. આજે પણ અમદાવાદમાં તાપમાન 43°C અને ગાંધીનગરમાં 42°C ની આસપાસ રહેવાનું અનુમાન છે. એટલે કે, હાલ પૂરતી તો ગરમીથી કોઈ જ રાહત મળવાના એંધાણ નથી.